شعرك خفيف و كيطيح حتى انا كنت فحالك ما خليت ما درت ليه كاع الخلطات و الجلطات كاع الزيوت اللي كاينين على وجه الارض درتهم ووالو لا نتيجة
حتى لواحد النهار قالت لي واحد لمراة كبيرة كتجي عندنا على واحد الوصفة جربتها و صراحة تصدمت بنتيجتها
الشعر دغيا ما بقاش كيطيح و بدى كيقوى وكيطوال و حتى الدار لاحضو الفرق فشعري
المهم ما نطولش عليكم
الوصفة كتكون من القطران ايه القطران لي كانو كيديرو جداتنا و كانو شعوراتهم تباركالله عند رجليهم
كتخلطي مقدار نصف كاس من القطران الحر مع2 جوج كيسان ديال الحنة
و كتحكي بصلة حمرة كبيرة الماء ديالها هو لي كتخلطي بيه الحنة و القطران وماتنسايش تزيدي عليهم شوية دزيت الزيتون باش شعرك ماينشفش
كتفرقي شعرك الى خصلات و كدهني بالخصلة بالخصلة من الجدر حتى لتحت ما تخلي حتى بلاصة
منين تكملي غطي شعرك و باتي بيه هاديك الليلة
فالصباح غتكون الحنة نشفات حتحتيها يعني حاولي تقشريها من شعرك ثم دهنيه مزيان بزيت اركان او زيت الزيتون غطيه مرة اخرى و باتي بيه ليلة اخرى
و فالصباح التالي عاد غسليه و مانحتاجش نقول ليك على النتيجة راك غتلاحضيها بنفسك
و احسن حاجة فهاد الوصفة انها كتعمل غير مرة وحدة يعني ما تحتاجيش داومي عليها
من بعد ما تغسلي شعرك بشي سيمانة ممكن تلاحضي شي قشرة غليضة فجلدة راسك ماتخافيش بلعكس فرحي لان هاديك راه غير الجلدة القديمة ديال راسك كتبدل وكتجي فبلاصتها جلدة جديدة كتعطي الشعر حسن من الاولى
و بالنسبة لريحة القطران لي مجهدة ضرورة ما تصبري عليها حيت الي بغا الزين كيصبر على تقيب الودنين
خليتكم هاد الساعة على خير حتى تجربو و ردو عليا الخبار
الجمعة يوليو 18, 2008 1:43 pm